Plazhi i Shëngjinit mbetet një nga destinacionet më të preferuara për të gjithë familjet shqiptare, si edhe ato që vijnë çdo vit nga zonat e Diasporës, Kosovës, Maqedonisë, dhe të Malit të Zi.
Por çfarë ka të veçantë ky plazh i cili preferohet çdo vit e më tepër.
PAK HISTORI
Një qytet afër Lezhës, Shëngjini, 8 km në veriperëndim, në bregun e Adriatikut. Jul Cezari, në veprën “Lufta Civile” e përmend emrin e këtij limani si Nymfeum në vitin 48 para Krishtit.
Këtu erdhi Flota e Mark Antonit në fushatën e Cezarit kundër Pompeut. Emri Nymfeun lidhet me çetën e nymfave apo të zanave. Nymfeuni, është njohur në epokën romake, si një liman shumë i mbrojtur “Tutisimuss portus”. Në mesjetë ky liman njihet me emra të tjerë, quhet limani Meduo.
Në një hartë të shek.XIII të Pjetër Viskontit njihet madje edhe me emrin Medea. Gjate mesjetës përmendet ky liman si “Portus”, “Medue”, “Porto di Medea”. Etimologjia e ketij emri ka mbetur ende pa u sqaruar. Sipas A.Majerit termi Medua, lidhet me emrin antik të qytetit Medeon – Meduni i sotem, në bregun dalmat.
Emri i Medeas është lidhur edhe me emrin e fshatit Mjedë. Gjithsesi ky toponim mbart një jehonë mitologjike të stërlashtë. Kurse Shëngjin është një kalk i emrit të shënjtorit Shën Gjin, ose i shënjtorit Shën Gjon Pagëzorit, që shkurtimisht ka dhënë fjalën Shëngjin. Pra, një simbiozë mendësish mitologjike dhe fetare deri në kohën e sotme.
Ky material është përgatitur nga redaksia e ALPENews.al, për “Summer 2018”.