Tirana është 8 javë larg misionit final. Rikthimi në Kategorinë Superiore ka qenë dhe mbetet objektivi kryesor i bardhebluve, ndaj pas eliminimit nga Kupa e Shqipërisë, e gjithë vëmendja është përqendruar vetëm te ngjitja.
Pozitat aktuale janë tejet të favorshme, megjithatë, për të mos diskutuar elitën, Ze Maria pret maksimumin e mundshëm prej 720 minutave të fundit, pra, 24 pikë.
Veç përgatitjeve që po kryhen në fushë për të pasur sukses në fazën “play-off”, klubi po punon njëkohësisht edhe për sezonin e i ri, ku sigurisht e llogarisin veten në elitë.
Dhe planet i kanë nisur me sulmin. Dyshja SentamuNgoo po projektohet edhe për sezonin tjetër. Pesha e ofensivës do i besohet dyshes, që deri më tani ka dhënë garanci në Kategorinë e Parë.
Shifrat flasin në favor të të huajve, të cilët, nga 46 gola të shënuara deri më tani, kanë realizuar afro gjysmën. Megjithatë, “finalet” me ekipet si Pogradeci, Tomori, Apolonia dhe Bylisi do të jenë një test i vërtetë për të dy futbollistët.
Në rast se do të ruajnë rimtin duke zgjidhur ndeshjet me golat e tyre, atëherë me siguri mund ta themi që Superiorja do të nisë me Sentamunë dhe Ngoonë, të cilët respektivisht kanë shënuar 11 dhe 9 gola.
Ugandezi erdhi gjatë verës në Shqipëri dhe nënshkroi një kontratë që e mban lidhur për 2.5 vite. Një sezon po shkon drejt fundit, ndaj, dashur pa dashur, ai edhe kampionatin tjetër do të jetë bardheblu.
Shanset për largim janë të pakta, e megjithatë në futboll kurrë nuk i dihet dhe sidomos nëse do të vinte ndonjë ofertë joshëse, që klubi nuk do t’i thoshte dot “jo”.
Disi më ndryshe është gjendja e Ngoosë. Anglezi, kur erdhi në nisje të këtij kampionati, firmosi një kontratë sozonale, por me opsion rinovimi për një tjetër vit. Derisa palët kanë shfaqur hapur dëshirën për vijimësinë e marrëveshjes, zgjatja pritet që të mos hasë pengesa.
