Mjeku epidemiolog në ISHP Dritan Ulqinaku, thotë se të gjitha vatrat e infeksionit të covid-19 në Shqipëri janë izoluar dhe sfidë për ta mbetet Tirana.
“Është një lajm shumë i mirë, nuk mund të themi se e kemi kaluar, nuk mund të themi se jemi 100% të optimistë, por që realisht është një lajm shumë i mirë. Realisht ky virus është virus urban, Tirana është beteja më e vështirë që ka Shqipëria, sepse popullata është e dendura dhe mikse. Tirana është sfida e vërtetë e jona. Nëse ne do të fitojmë në Tiranë, vatrat të tjera janë të menaxhueshme”, ka thënë Ulqinaku në Ilva Now.
Më tej, mjeku ka thënë se masat e distancimit social e mbajnë të paprekur popullatën nga virusi.
“Masat e distancimit social e mbajnë të pa prekur këtë popullatë, por në momentin kur ka çrregullim, patjetër që numri përhapet menjëherë. Ne nuk presim kudo, nga veriu në jug, por janë këto vatra, që deri sot i kemi vënë nën kontroll. Kemi ditë që nuk dëgjojmë raste të reja, që tashmë e kanë kaluar këtë virus. Kanë funksionuar masat dhe janë këto masa që mund të shpresojmë, sepse qëllimi ynë nuk është zhdukja se është pamundur, por e vetmja mundësi e jona është menaxhimi dhe mbajtja e situatës nën kontroll. Numri ka ardhur dita ditës duke u ulur dhe kjo është situatë e menaxhueshme. Kjo është një luftë e gjatë dhe në pritshmëritë e mia që shifrat nga 0-20 do të jetë e pritshme. Nëse jemi të kujdesshëm dhe vigjilentë, ne themi se kjo situatë do të jetë e menaxhueshme dhe masat tjetra do të vijnë duke u lehtësuar”, shtoi ai.