Në lidhje me vrasjen e dyshuar si vrasje me porosi të një gjeorgjiani në Berlin, Kremlini ka reaguar duke dëbuar dy diplomatë gjermanë. Më parë ishte Gjermania ajo që dëboi dy diplomatë rusë.
Të dy diplomatët gjermanë duhet të largohen brenda 7 ditësh nga Rusia, bëri të ditur Ministria e Jashtme në Moskë. Qeveria ruse reagon me këtë pas dëbimit të dy diplomatëve rusë nga Gjermania. Javën e kaluar, Ministria e Jashtme në Berlin i shpalli “non grata” dy diplomatë rusë. Gjermania akuzon Rusinë, se nuk bashkëpunon sa duhet për zbardhjen e vrasjes së një gjeorgjiani në mes të Berlinit.
Në reagimin e parë qeveria gjermane e kritikoi këtë hap kundërveprues të Rusisë. “Vendimi lëshon sinjalin e gabuar dhe është i pajustifikuar”, deklaroi një zëdhënëse e Ministrisë së Jashtme në Berlin. Qeveria gjermane parasheh “hapa të tjerë” në kuadër të zbardhjes së vrasjes. Në mëngjes u thirr në Mínistrinë e Jashtme në Moskë ambasadori gjerman.
