Një furgon ka hyrë mes turmës së këmbësorëve në qytetin e Münster, në Gjermaninë Perëndimore duke vrarë 4 persona, e mes viktimave është edhe autori i ngjarjes, i cili thuhet se u vetëvra, kanë konfirmuar zyrtarisht autoritetet gjermane.
Të paktën gjashtë nga 30 të lënduarit janë në gjendje kritike, raportojnë mediat gjermane, duke cituar burime policore.
Natyra e incidentit mbetet “e paqartë”, tha policia në një postim në Twitter duke i bërë thirrje të gjithëve që të “shmangin spekullimet”.
Sipas raporteve të disa mediave gjermane, policia po kërkon eksplozivë në makinën e të dyshuarit që u fut mes turmës. Megjithatë, nuk ka pasur konfirmim zyrtar për këtë nga policia.
Zyrtarët e policisë gjithashtu po verifikojnë aktualisht informacionin për të dyshuar të tjerë të mundshëm, të cilët thuhet se dolën nga makina dhe u larguan nga vendi i ngjarjes, tha një zëdhënës i policisë lokale, i quajtur Andreas Bode për median gjermane.
Ai gjithashtu konfirmoi se policia kishte gjetur një “objekt të dyshimtë” në makinën që përplasi turmën, por nuk pranoi të jepte ndonjë hollësi rreth saj.
Zyrtari i policisë tha se është ende e paqartë nëse objekti është një mjet shpërthyes.
Shoferi i automjetit u vetëvra, konfirmoi policia gjermane për agjencinë e lajmeve “DPA”.
Policia u kërkoi njerëzve që ndodheshin aty për të shmangur kalimin në zonë dhe të largoheshin menjëherë në një vend të sigurt.
Sakaq, një burim sigurie i tha “Reuters” me herët: “Skenari është i tillë që një sulm terrorist nuk mund të përjashtohet.”
