Presidenti Rexhep Taip Erdogan njoftoi të premten se Turqia do të financojë ndërtimin e 500 banesave në Shqipëri. Dhe menjëherë pas kësaj thirrje, delegacioni i Ankarasë ka nisur konsultimet për hapat që do të ndërmerren.
Pas tërmetit shkatërrues të 26 nëntorit, lideri turk i bëri thirrje edhe mbarë botës islame që të ofrojë ndihmë për vendin tonë.
“Delegacioni ynë i përbërë nga Drejtoria e Administrimit të Banesave Publike dhe Ministria e Mjedisit dhe Urbanistikës kryesuar nga Ambasadori Yörük, në zbatim të udhëzimit të Presidentit Erdogan për ndërtimin e 500 banesave në Shqipëri, zhvilloi takimin e parë me delegacionin shqiptar të kryesuar nga Ministrja e Kulturës, Elva Margariti’, thuhet në njoftimin e ambasadës turke në Facebook.
