Procedohet në gjendje të lirë një person me inicialet Sh.I në Tiranë pasi tërhoqi zvarrë me makinë një qen. Videoja rrënqethëse e publikuar në mediat sociale ngriti alarmin duke sjellë kështu dënimin e autorit për veprën penale keqtrajtimi i kafshëve.
Gjithashtu autori është gjobitur me 6000 lekë ndërkohë që qeni iu dorëzua shërbimeve të spacializuara. Me rastin do të merret Prokuroria e Tiranës.
Njoftimi i Policisë:
Komisariati i Policisë Rrugore dhe Komisariati i Policisë Nr. 6, gjatë patrullimeve në terren, kanë konstatuar shtetasin Sh. I., duke tërhequr me makinë një kafshë shtëpiake (qen). Shtetasi Sh. I., është proceduar në gjendje të lirë për veprën penale “Keqtrajtimi i kafshëve”, si dhe është gjobitur me 6.000 lekë sipas Kodit Rrugor, ndërsa kafsha shtëpiake iu dorëzua shërbimeve të specializuara të Bashkisë. Videoja e këtij rasti është publikuar dhe në rrjete sociale. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
