Vdekja në Spitalin Infektiv të 69-vjeçarit rikthen përplasjet politike mes opozitës dhe qeverisë. Ish-deputeti i PD-së për qarkun e Shkodrës, Bardh Spahi me anë të një statusi në rrjetet sociale shprehet se qeveria po manipulon faktet sa i përket të prekurve nga koronavirusi.
“Sot përsëri u kapën në flagrancë, duke manipuluar faktet. Pacientin e vdekur nga Covid-19, e deklarojnë të vdekur nga hemorragjia cerebrale, tamam siç bënë disa ditë më parë, e si me raste të tjera prej fillimit. Pacienti kishte ndërruar jetë që në mëngjes dhe e fshehën si fakt.
U detyruan ta pranojnë vetëm në mbrëmje pas denoncimit në media. Por zbatimi verbërisht i urdhrave politikë vazhdon. Edhe pse e pranojnë se pacienti kishte rezultuar pozitiv me Covid-19, e mohojnë si shkak të vdekjes. Dhe jo rastësisht, ky stil makabër ndodh përsëri me Shkodrën”, deklaroi Spahia.
“Pjesë e të njëjtës skemë duket edhe manipulimi i shifrave të viktimave. Njerëz që shtrohen me Covid, kur humbin jetën, u regjistrohen shkaqe të tjera, edhe pse të shkaktuara nga Covid.
Luajnë teatër sikur zbatojnë rekomandimet e OBSH, por e vërteta është krejt ndryshe dhe shifrat e Edi Ramës janë po aq të besueshme në sytë e vetë OBSH, sa ato të Kinës. Manipulimi që mbulohet me manipulime të tjera është krejt i dukshëm.
E përsëris për të disatën herë e do vazhdoj ta bëj, si mjek së pari, se është koha për një hetim të thelluar epidemiologjik, për më shumë testime në personelin e Spitalit të Shkodrës, ku mungesa e masave mbrojtëse për ekipet atje, ka prodhuar këto rezultate alarmante për shëndetin dhe jetën e tyre e të pacientëve që ata kurojnë e u shërbejnë me vetëmohim”, theksoi Spahia.
Sipas tij, ky lloj falsifikimi që ka nisur prej datës 28 shkurt dhe më herët, duhet të jetë objekt hetimi nga prokuroria, pasi edhe vetëm për efekt statistikash, është cenim i drejtpërdrejtë i shëndetit të qytetarëve në një kohë pandemie.
