Detaje të reja janë zbardhur në lidhje me ngjarjen e rëndë që u parandalua në Shkodër, ku një 27-vjeçare tentoi të hidhej në lumin Buna, së bashku me 4 fëmijët e mitur.
Mësohet se e reja ishte e divorcuar prej disa kohësh. Pas ndarjes nga bashkëshorti, ajo ka jetuar tek prindërit.
Në muajt e fundit 27-vjeçarja ka shfaqur një gjendje shumë të renduar psikologjike, dhe kështu ka shkuar drejt këtij akti të rëndë. Fatmirësisht, ajo është parandaluar nga policia që patrullonte në zonë.
Ngjarja ka ndodhur rreth orës 14:15, kur e reja është pikasur duket tentuar të hidhet në lumë bashkë me 4 fëmijët e saj 7, 5, 3 dhe 1 vjeç. 27-vjeçarja dhe fëmijët e saj u shoqëruan në ambientet e Komisariatit të Policisë Shkodër, ndërsa grupi hetimor vijon punën për sqarimin e rrethanave të rastit.
Kujtojmë se disa muaj më parë, Alma Arrazi i dha fund jetës së saj bashkë me 3 fëmijët e saj të mitur duke u mbytur në lumin Buna, pas problemeve që kishte me bashkëshortin. Për ngjarjen, bashkëshorti Erdgys Arrazi ndodhet në burg, akuzuar për dhunë në familje dhe shkaktim të vetëvrasjes.
