Është tensionuar edhe më shumë situata te Liqeni i Thatë, në kryeqytet, ku përveç të riut Klajdi Peti mbi çatinë e shtëpisë është ngjitur dhe një person tjetër. Ata kërcënojnë se do t’i hapin fund jetës, duke u hedhur nga çatia, pasi IKMT ka shkuar për t’iu prishur shtëpitë, duke u shpallur zonën si zonë parku.
Ngjarja po ndodh te Liqeni i Thatë, në Tiranë, ku pas djalit të vogël të familjes Peti, Klajdit, mbi çati është ngjitur dhe kushëriri i tij, Albert Osmani, ku të dy kërcënojnë të hidhen. Në zonë ndodhen forca të shumta policie, të cilat po negociojnë për të qetësuar situatën dhe zbritur poshtë dy të rinjtë.
Klajdi Peti nuk pranon të lirojë shtëpinë, duke thënë se e ka me letra, ndërkohë që zona ku ndodhet banesa e tij është shpallur si zonë parku. I riu Klajdi Peti ka folur për Report Tv nga çatia e shtëpisë, duke sqaruar se nuk ka zgjidhje tjetër, pasi nuk ka ku të shkojë nëse i shembet banesa.
