Presidenti grek Prokopis Pavlopulos i dërgoi një mesazh Turqisë, duke u shprehur se vendi i tij është një avokat par excellence për paqen dhe miqësinë mes kombeve dhe një garantues i fortë i vlerave ndërkombëtare dhe evropiane – raportojnë mediat në Athinë.
“Ne duhet ta mbrojmë këtë qytetërim, veçanërisht sot, brenda një familje të madhe evropiane, kundër atyre që dëmtojnë Europën dhe rrënjët e kulturës së saj”, vuri në dukje Pavlopulos, një frazë që bart brenda dhe një kontekst politik provokues.
“Bazuar në trashëgiminë e këtij qytetërimi, ne duhet t’u dërgojmë të gjithëve, edhe fqinjit tonë të veçantë – Turqisë, një mesazh se jemi avokatë të paqes dhe miqësisë midis kombeve”, tha presidenti grek.
Tensionet midis Greqisë dhe Turqisë kanë vazhduar për një kohë të gjatë, sepse, sipas autoriteteve greke, hapësira ajrore greke mbi Qipro shkelet rregullisht nga aviacioni turk.
Kohët e fundit, presidenti grek tha se Greqia dhe Qipro nuk do të lejonin shkeljen e sovranitetit në hapësirën ajrore nga avionët luftarakë turq.
Kryeministri grek Alexis Tsipras tha disa ditë më parë se ekziston një rrezik i vazhdueshëm i një incidenti “të nxehtë” me Turqinë, që sipas tij është një fqinj i paparashikueshëm që nuk respekton ligjin ndërkombëtar.
Në një intervistë me televizionin grek, ai nuk e fshehu shqetësimin rreth tensioneve në marrëdhëniet me Turqinë dhe, për këtë arsye, tha se “Greqia duhet të të jetë gati”.
“Greqia ka aleatë më të fortë se kurrë”, theksoi Tsipras, duke kujtuar se vendet e Bashkimit Evropian mbështetën Republikën e Qipros në samitin e fundit.
Ai gjithashtu vuri në dukje aleancat që Greqia ka vendosur me vendet e rajonit.
“Ne jemi në gjendje të ndërtojmë një rrjet stabiliteti”, tha Tsipras, duke shpjeguar se vetëm Turqia refuzon të flasë dhe vazhdon me veprime provokative.
