Ministri i Jashtëm i Turqisë, Mevlüt Çavuşoğlu, tha se Greqia tregoi qartë se është kundër dialogut për zgjidhjen e tensioneve në Mesdheun Lindor, raporton Anadolu Agency (AA).
Çavuşoğlu këtë vlerësim e bëri në konferencën e përbashkët për media pas takimit me Ministrin e Punëve të Jashtme të Republikës së Kongos.
Kryediplomati turk duke folur në lidhje me stërvitjen e Turqisë në Mesdheun Lindor tha se, “Stërvitja jonë kryhet në kuadër të rregullave të NATO-s”.
“Nëse Greqia i beson vetes, le të ulet në tryezë. Le të tregojë para të gjithëve se është në të drejtë. Edhe ne kemi gjëra për të thënë”, u shpreh ai.
Kujtojmë se më herët sekretari i Përgjithshëm i NATO-s, Jens Stoltenberg, kishte njoftuar se Turqia dhe Greqia kanë rënë dakord të zhvillojë bisedime teknike për krijimin e mekanizmave për parandalimin e konfliktit në Mesdheun Lindor.
