Presidenti i Serbisë Aleksandër Vuçiç ka deklaruar pas takimit me përfaqësuesit e serbëve në Kosovë se heqja e barrikadave në veri të Kosovës do të nisë mëngjesin e kësaj të enjteje. “Për 24 orë barrikadat do të hiqen”, u shpreh ai mbrëmjen e djeshme.
Ai tha paraprakisht se janë dhënë garanci se kërkesat e serbëve për heqjen e barrikadave do të plotësoheshin. Mbrëmjen e djeshme ai zhvilloi një takim me përfaqësuesit e serbëve nga Kosova në kazermën e Ushtrisë Serbe në Rashkë, afër kufirit me Kosovën.
Në takim ai u shpreh se polici që u lirua nga autoritetet në Kosovë, Dejan Pantiçi ka mbërritur në shtëpi duke e cilësuar këtë një fitore simbolike. Arrestimi i ish-policit serb, për të cilin Kosova dyshon se ka sulmuar anëtarët e Komisionit Qendror të Zgjedhjeve, ka qenë arsyeja e barrikadave që përfaqësuesit serbë në veri të Kosovës vendosën që nga 10 dhjetori.
Lirimi i tij ishte një nga kushtet për heqjen e bllokadave dhe më 28 dhjetor autoritetet në Kosovë ndryshuan masën e sigurisë, nga paraburgimi në arrest shtëpiak.
Duke folur për kërkesën e serbëve për të mos lejuar hyrjen e forcave speciale të Kosovës në veri, Vuçiç përmendi deklaratën e misionit të NATO-s (KFOR) të datës 28 dhjetor.
“Ne kemi një dokument të posaçëm që i jep të drejta edhe popullit serb në veri të Kosovës edhe shtetit të Serbisë, por gjithashtu i imponon KFOR-it obligim që të parandalojë hyrjen e forcave të sigurisë së Kosovës në veri për herë të parë”, tha ai.
