Nis me tensione dita e dytë e vizitës së Aleksandar Vuçiç në Kosovë. Protestuesit nga Skënderaj kanë bllokuar dy rrugë kryesore nga Mitrovica për në Skenderaj. Është fjala për bllokimin e rrugës në fshatin Runik dhe Vojtesh, për të mos lejuar vizitën e presidentit të Serbisë, Aleksandër Vuçiç në fshatin Banjë të Skënderajt.
Një grup protestuesish kanë dalë, që nga ora 06:00 e mëngjesit, në rrugën që lidh Skënderajn me Mitrovicë, për të protestuar kundër vizitës së presidentit serb.
Madje ata kanë vënë kamionë, goma edhe një barrikadë me drunj, të cilës pastaj i kanë vënë zjarrin. Qytetarët shprehen të vendosur për të mos lejuar kalimin e eskortës së presidentit serb.
Kamioni dhe barrikada e drurëve vendosur në rrugë
Motoja e tyre është “Vuçiçi nuk kalon”, ndërsa në duar mbajnë pankarta ku shkruhen emrat e të vrarëve nga ushtria serbe në luftën e Kosovës për liri, ndërsa 1648 persona raportohen të zhdukur që prej përfundimit të konfliktit 19 vjet më parë.
Pankarta me emrat e të vrarëve nga ushtria gjatë luftës në Kosovë
Aleksandar Vuçiç po zhvillon në Kosovë një vizitë dy ditore. Dje ai u ndal në Veri të Kosovës nga ku shprehu mesazhe bashkëpunimi me shqiptarët.
