Një 55-vjeçar shqiptar i identifikuar si Eduart Mullaj ka mbetur i plagosur nga të shtënat me armë zjarri në orët e para të mëngjesit të së hënës në zonën e Patisias, në Athinë. Autorët, ende të paidentifikuar, janë larguar nga vendi i ngjarjes dhe policia ka nisur hetimet për zbardhjen e rrethanave të sulmit.
Ngjarja ndodhi rreth orës 04:55, në kryqëzimin e rrugëve Vrutou dhe Themu Anninou. Sipas informacioneve paraprake, disa persona iu afruan 55-vjeçarit dhe pas një përplasjeje verbale e qëlluan me armë. Burri u plagos në gjymtyrët e poshtme dhe u transportua me ambulancë të EKAB-it në spitalin “Georgios Gennimatas”, ku mori ndihmën mjekësore.
Dëshmitarët: “Dëgjuam zëra dhe më pas tre të shtëna”
Një banor i zonës ka treguar për mediat lokale se pak para të shtënave kishte dëgjuar një grup të rinjsh që flisnin me zë të lartë dhe po debatonin.
“Dëgjuam një grup prej katër ose pesë të rinjsh. Grindeshin, debatonin dhe flisnin me zë të lartë. Më pas dëgjuam një të shtënë. Rreth dhjetë sekonda më vonë u dëgjua e dyta dhe pas rreth 30 sekondash një tjetër”, ka rrëfyer banori.
Megjithatë, dëshmitari ka theksuar se nuk mund të konfirmohet nëse të rinjtë kishin lidhje me sulmin, pasi mund të kenë qenë thjesht duke kaluar rastësisht në atë zonë. Sipas dëshmisë, policinë e ka njoftuar vajza e 55-vjeçarit.
