Një vit burg, kur ishtë dënuarit politikë detyroheshin të punonin në minierë, do të njihet si dy vite punë. Qeveria miratoi dje projektligjin që lehtëson dhe shkurton vitet e punës për ishtë dënuarit politikë.
Sipas ligjit të ri që do të kalojë në kuvend, çdo i dënuar që ka punuar me detyrim në minierë, do të përfitojë pension minatori, shkruan “Panorama”.
Nga ana tjetër, ligji lehtëson edhe procedurat për dokumentet. Kjo, pasi kërkesa e deritanishme për të dorëzuar vërtetim nuk do të jetë më një detyrim për ata të dënuar që janë në prag pensioni. Me ligjin e ri, ata që kanë punuar dy vite në nëntokë, do t’u njihen si katër vite kontributive, ata që kanë 5 vite, do t’u njihen si 10 e kështu me radhë.
ÇFARË PARASHIKON LIGJI
“Koha e vuajtjes së dënimit të ish-të dënuarve politikë në burgjet ku punohej në minierë në nëntokë, për efekt pensioni, të njihet si punë e kryer në minierë në nëntokë. Periudha njihet sa dyfishi i periudhës së qëndrimit në këto burgje”, thuhet në ligj. Me skemën e re të pensioneve, sa më gjatë të punosh, aq më shumë del masa e pensionit. Duke llogaritur një vit për dy vite kohë pune, edhe masa e pensionit rritet.
Ligji i ri parashikon gjithashtu se, “Paga llogaritet sa paga e punës në minierë. Vërtetimi për kohën e vuajtjes së dënimit në burgjet ku punohej në minierë në nëntokë lëshohet nga Ministria e Brendshme, në bashkëpunim me Ministrinë e Drejtësisë”. Kjo do të thotë se lehtësohen procedurat për nxjerrjen e dokumenteve nga një zyrë në tjetrën. Do të jenë vetë këto institucione që do të nxjerrin dokumentet.
PREMTIMI I AHMETAJT
Sipas Ahmetaj, janë 264 të dënuar në prag pensioni që përfitojnë drejtpërsëdrejti nga kjo nismë. Në një videokonferencë me ish-të përndjekurit para rreth 1 muaji, ai u premtoi atyre ndryshimin e skemës.
“Ju jeni 264, pra, jeni pak më shumë se 150 vetë që përfitoni nga ky ndryshim. Jeni 264 dhe menjëherë, sa të ndryshojë ligji, ju menjëherë automatikisht përfitoni të drejtën që ju ka munguar”, shtoi ministri. Ahmetaj premtoi se ata të dënuar që janë në prag pensioni, nuk do të duhet më të enden nga njëra ministri në tjetrën për të kërkuar vërtetim. Ky dokument do të hiqet dhe vitet e punës do të njihen automatikisht, duke i çliruar ata nga loja e ping-pongut që bënin institucionet, me alibinë se nuk ekzistojnë dosjet.
