Detaje të reja kanë dalë nga dosja e prokurorisë për Amarilda Lekën, e cila akzuohet për mashtrimin në vlera të mëdha monetare.
33-vjeçarja sipas panoramës e cila hiqej si juriste e Gjykatës së Lartë dhe duke u premtuar se do i lironte të afërmit e burgosur, u zhvaste miliona lekë qytetarëve, me pretekstin se kishte njohje me gjyqtarët dhe do ndikonte në vendimet e tyre.
Në dosjen e prokurorisë, thuhet se nga hetimet paraprake ka rezultuar se shtetasi B. Zeneli ka kallëzuar se para rreth 3 vitesh ai është mashtruar duke iu marrë 60 mijë auro nga Amarilda Leka dhe J.G, që jetojnë në Tiranë.
Këta dy shtetas i kanë premtuar se do ta ndihmonin në shkallë të ndryshme të gjyqësorit për një të afërm të tij, që ishte duke u gjykuar për vrasje.
B.Zeneli ka treguar në kallëzimin e tij se fillimisht, nëpërmjet një të njohuri të tij është takuar me një person që kishte njohje me J.G, i cili ishte i fejuari i shtetases Amarilda Leka.
Kallëzuesi më pas është takuar me këta persona në një lokal, ku J.G i ka thënë se për të nxjerrë kunatin e tij nga burgu e ndihmonte Amarilda.
Të nesërmen e ka telefonuar kallëzuesin Amarilda e cila i ka thënë “punoj si gjyqtare në Gjykatën e Krimeve të Rënda dhe do të ndihmoj për problemin që ke”.
Kallëzuesi thuhet në dosjen e prokurorisë, ka sqaruar se gjatë vitit 2015 i kanë marrë në total 60 mijë euro këta dy shtetas.
