Mjekja e njohur Anika Dokle, e cila është dhe vajza e ish-deputetit socialist, Namik Dokle, ka shkruar një status të shkurtër lidhur me infektimin nga pandemia të dy prindërve të saj. Në statusin e saj, ajo shkruan dhe flet lidhur me përgjegjësinë që ndjen një mjek kur detyrohet që të bëhet doktor i prindërve. Po ashtu ajo bën me dije se të dy prindërit e saj ishin të vaksinuar me “Sinovac” por sërish u infektuan nga pandemia.
“Kur Covidi të prek të dashurit e shpirtit… (në vend të një refleksioni) -Të jesh doktor i prindërve të tu është një dimension gati hyjnor. -Kur rrezikohen ata që të kanë bërë kokën, të varen kryet mbi supe. -Frika është përbindëshi më i madh i “pyllit” njerëzor. -Dritëhije, shumë dritëhije… -Barku i familjes lufton me mish e me shpirt dhe miqtë e të afërmit me mendje(rrofshin e qofshin!). -Intensiteti i sëmundjes nga Covidi ndryshe nga ato kroniket, të rrit intensivisht dëshirën për të jetuar në liri, se Covidi është një “burg” ku jo pak njerëz kanë qenë të dënuar edhe me vdekje. -Triumfi mbi kovidin është si fitorja e një maratone jete dhe unë kam dy prindër maratonomakë. -E bindur plotësisht te roli mbrojtës i vaksinave, qoftë edhe Sinovac(me këtë të fundit janë vaksinuar të dy prindërit e mi). Mund t’ju duket patetik ky status i imi, por është për miqtë e vërtetë dhe të afërmit, e sidomos për ata që e kanë provuar në lëkurë Covidin. Të tjerët, qofshin mirë aty ku janë!,”-shkruan ajo në Facebook.
Lajmin për infektimin e dha vetë ish-kryetari i Kuvendit të Shqipërisë, Namik Dokle, i cili zbuloi se kishte nisur të shkruante një libër që fliste pikërisht për virusin.
