4 vite më parë, politikani i njohur shqiptar Sokol Olldashi humbi jetën si pasojë e një aksidenti rrugor, i cili rezultoi fatal. Sigurisht, vdekja e tij e parakohshme tronditi politikën, por mbi të gjitha ishte një humbje e thellë për familjarët.
Dje deputeti demokrat do të festonte ditëlindjen e tij të 45-të dhe për nënën e tij kjo ditë është edhe më e rëndë se të tjerat. Përmes një statusi në Facebook, ajo i ka prekur të gjithë tek shkruan se ka përgatitur ëmbëlsirën e tij të preferuar.
“E si mund të bëhet ditëlindja jote pa ty bir? 45 do të mbushje sot…Ta përgatita dhe ëmbëlsirën e preferuar, gostita me ata që erdhën, ata që vijojnë të të duan, miqtë e tu të fëmijërisë, të cilëve u mungon…Sa shumë të prita bir. Sa dëshirë për atë përqafim të ngrohtë. Do vijoj të të pres gjersa të jap frymë e të të vij pranë të kujdesem për ty, sikurse më parë. Dhimbje…dhe përsëri mall pafund.”- shkruan nëna e të ndjerit, Kozeta Mamaqi.
Olldashi u nda nga jeta në nëntor të 2013-it në moshën 41-vjeçare, duke lënë pas bashkëshorten dhe 2 djemtë.
