Rreth 70 shtetas grekë janë kthyer pas në pikën e kalimit kufitar të Kakavijës, pas kontrolleve të imtësimshme që iu është bërë nga ana e autoriteteve shqiptare.
Ata udhëtojnë sot drejt Shqipërisë për ceremoninë përkujtimore të Konstantinos Katsifas, i cili u vra nga forcat RENEA në zonën e Bularatit, pasi qëlloi me armë në drejtim të policisë vendore të Gjirokastrës.
Burime bëjnë me dije se shtetasit grekë kanë pasur një përplasje dhe me mediat që kanë qenë sot të pranishme në kufi, pasi kanë kërkuar që të mos filmoheshin.
Gazetarja e Fax News Ervina Shehaj shprehet se derimë tani kanë hyrë në tokën shqiptare 5 autobusë me shtetas grekë, ndërsa arsyeja se pse 70 grekë janë kthyer mbrapsht është fakti se ata konsiderohen si persona të rrezikshëm.
Ndërkohë që burime bëjnë me dije po ashtu se sot në Gjirokastër ka një prani të shtuar të policisë shqiptare dhe të forcave të antiterrorit, për të shmangur çdo incident të mundshëm.
Forcat RENEA dhe ato të anti-terrorit të cilët po mbajnë në survejim kufirin e gjelbër me Greqinë, pas dyshimeve se ekstremistë grekë, ndër ta edhe persona të shpallur “non grata” nga autoritetet shqiptare, mund të hyjnë ilegalisht në vendin tonë për të marrë pjesë në homazhet për Kacifan.
Nga ana tjetër sot në Gjirokastër do të ketë një tubim përpara konsullatës greke nga ana e disa grupimeve partiotike shqiptare, të cilët do të kërkojnë që të zbardhen 7 vrasjet që kanë ndodhur vetëm në dy muajt e fundit të shqiptarëve në shtetin helen.
Ka pasur zëra se një pjesë e tyre do të tubojnë drejt Bularatit, çka mund të sillte dhe një tensionim të situatës me shtetasit grekë që kanë mbërritur për ceremoninë e Katsifas.
