Kryeministri Edi Rama është shprehur se gazsjellësi “TAP” do të garantojë një ekonomi të qëndrueshme dhe konkurruese në një të ardhme shumë të shpejtë.
Shefi i qeverisë ka theksuar se kjo industri do të krijojë mundësi punësimi për qytetarët e Shqipërisë.
Rama është ndalur edhe tek pohimet se Shqipëria është një vend problematik për bizneset e huaja, duke thënë se projekti “TAP” ka treguar në të vërtetë të kundërtën e disa pretendimeve, që sipas Ramës, nuk janë objektive përkundrejt mundësive dhe kushteve që ofron Shqipëria.
“Më vjen shumë mirë të them sot se jemi në momentin e heqjes së lakut nga fyti nga ky territor. Në javët në vijim do mund të finalizojmë kontratën, pastaj nisim punimet për të mos i ndalur më në infrastrukturën publike. Por, mendoj që ia vlen të nënvizohet se ekonomia shqiptare do marrë 1 miliard euro injeksion në dy dekada të ardhshme dhe këtë e thotë një studim i universitetit të Oksfordit.
Gjithashtu kjo do të krijojë një industri të re në Shqipëri. Kjo e kthen “TAP” në një kompani investitor, por shërben edhe si një forcë shtytëse për ekonominë e së ardhmes. Tashmë ka përfunduar 80% e projektit, e tashmë fillon lidhja me Italinë.
Ata shprehen se në Shqipëri se mund të ketë pengesa dhe vonesa në projekt. Ky grup erdhi në zyrën time dhe më tha se në të gjithë vendet e tjera kanë patur probleme, por vetëm në Shqipëri jo. Ndryshe nga çfarë shkruhet hera herës në raportet e caktuara, Shqipëria nuk është e vështirë për investimet e huaja. “TAP” ka krijuar punë dhe krijon që nga punëtorët, por edhe tek njerëzit e kualifikuar, mundësinë për punën dhe profesionin e tyre si dhe paguhen shumë mirë dhe me pagë të kënaqshme. Ka shumë të rinj dhe të reja që janë kthyer nga vendet e tjera për të ardhur e punuar në vendin e tyre,” ka thënë kryeminsitri Rama.
