Në fillim të muajit maj pritet të zhvillohet një takim mes presidentit të SHBA, Donanld Trump, dhe liderit të Koresë së Veriut, Kim Jong Un. Në emisionin “Kjo javë” me Nisida Tufën në “News24”, gazetari dhe publicisti Frrok Çupi, tha se një takim i tillë synon të shmangë një rrezik të madhe për mbarë botën.
Ai thotë se kjo është pikëpamja e parë e analistëve që e shohim me optimizëm këtë takim. Sakaq, ai shton se qëllimi i Koresë së Veriut është që të nënshkruajë traktin e paqes me SHBA.
Më tej, ai është ndalur edhe tek pikëpamjet e skeptikëve, të cilët sipas tij mendojnë se Kim Jong Un ka një as nën mëngë. Sipas tyre, Kim do të provokojë Trump, dhe më pas do të vijojë me të njëjtin qëndrim.
“SHBA kanë deklaruar se në të gjitha rrethanat janë të përgatitur për të përballuar një Kore të Veriut të çmendur, që mund të kthehet sërish në sjellje lufte”, tha Çupi.
“Megjithatë duhet të shtoj se është hera e parë që një president amerikan takohet me një lider koreano-verior. Është një konflikt dhjetëravjeçar”, vijoi ai.
Çupi thotë se nëse ky takim dështon, Presidenti amerikan do të “sulmohet” me deklarata edhe nga aleatët e tij, ndërsa thekson se nëse do të jetë pozitiv atë herë do të ketë ndryshim të raporteve në politikën botërore.
