Presidenti i SHBA-së, Donald Trump pret sot në Shtëpinë e Bardhë kryeministrin italian, Giuseppe Conte, një drejtues populist me të cilin ai ka të njëjtat pikëpamje, veçanërisht për imigracionin dhe tregtinë.
“Dy krerët do të kenë një takim kokë më kokë, më pas diskutimet dypalëshe do të zgjerohen”, sipas Shtëpisë së Bardhë.
“Italia është një aleat i rëndësishëm i NATO-s, një partner i rëndësishëm në Afganistan dhe në Irak dhe është faktor kyç për stabilitetin në rajonin mesdhetar”, theksoi presidenca amerikane që kishte njoftuar që prej fundit të qershorit për këtë vizitë, e para për kryeministrin italian, që Trump e cilësoi “super” gjatë samitit të fundit të G7-s në Kanada.
Dy krerët shkëmbyen një shtrëngim të ngrohtë duarsh nën vëzhgimin e kamerave gjatë fotos familjare të samitit.
“Ai është shumë i vendosur për imigracionin, ashtu si unë”, ishte shprehur presidenti amerikan, i cili synon të ndërtojë një mur përgjatë kufirit me Meksikën për të luftuar kundër imigracionit klandestin dhe nuk ka hezituar të ndajë fëmijët nga prindërit e tyre, të arrestuar për kalim të paligjshëm të kufirit.
Giuseppe Conte u zgjodh për të drejtuar qeverinë italiane nga drejtuesit e partive që fituan zgjehdjet legjislative të marsit, Lëvizja Pesë Yjet (antisistem) dhe Liga e Veriut (ekstremi i djathtë).
