Në një kohë kur situata politike në vend shfaqet e tensionuar, për shkak të publikimit të dosjes “Habilaj” dhe përfshirjes në të, të emrit të ish-ministrit të Brendshëm Saimir Tahiri, kryeministri Edi Rama ka njoftuar një takim në Ministrinë e Brendshme.
Në këtë takim, kreu i Qeverisë ka thirrur drejtues të Policisë së Shtetit, por nuk bëhet i ditur asnjë detaj mbi mesazhet që pritet të përcjellë gjatë mbledhjes.
Ministri i Brendshëm, Fatmir Xhafaj, tha se do të ketë vetting edhe në Polici, duke larguar ata që nuk bëjnë detyrën apo janë të lidhur me krimin.
“Nuk mundet ta ushtroni këtë përgjegjësi nëse nuk jeni të përgjegjshëm se çfarë përfaqësoni dhe çfarë duhet të bëni. Duhet të me punën tuaj jeta dhe siguria e qytetarit të mos cënohet. Ata që shërbejnë në këtë detyrë duhet të jenë persona me integritet të lartë profesional.
Kjo është një punë shumë e vështirë, që shkon deri në sakrifikimin e jetës. Nëse dikush nuk e kupton kështu qenien anëtar i Policisë së shtetit, por e shfrytëzon për interesat e tij apo interesa kriminale, bën mirë të largohet nga policia. Do ketë vetting edhe në Polici”,- tha ministri Xhafaj.
“Nuk kam asnjë ambicje personale në fushën e formimit profesional dhe karrierës, – tha Xhafaj, – ndaj e vetmja ambicje ime në përmbushjen e kësaj detyrë është një Shqipëri më e sigurtë pa kanabis, pa krim të organizuar dhe ku së bashku sigurojmë dhe shpëtojmë më shumë njerëz, parandalojmë të rinjtë të futen në rrugën e krimi. Dob të mbështes këdo që ka integritetin moral për të punuar në Policinë Shqiptare”.