Kreu i Kuvendit Gramoz Ruçi gjatë një bashkëbisedimi sot në gazetarët në nisje të sesionit të ri, ka folur edhe për deklaratat e kreut të PD-së Lulzim Basha dhe mundësinë e djegies së mandateve nga opozita. Në lidhje me akuzën e Bashës se parlamenti është fole e krimit, Ruçi deklaroi se parlamenti është zgjedhur nga sovrani dhe kush ka vlerësime të veçanta për individë të veçantë duhet t’i adresojë në institucionet përkatëse.
“Refuzoj të komentoj deklaratat politike si të maxhroancës dhe të minorancës.
Megjithatë nuk mund të qëndroj jashtë këtyre deklarimeve. Jam këtu për të bërë detyrën e kruyetarit të kuvendit. Kuvendi nuk mund të konsiderohet fole kriminelësh. Kuvendin e ka prurë sovrani aty sipas kushtetutës e ligjeve. Kush ka vlerësime të veçanta për individë të veçantë ka institucionet përkatëse. Kuvendi mbetet Kuvend dhe mbështet interesat e vendit”, tha Ruçi.
Lidhur me djegien e mandateve, Ruçi tha se nuk ka dijeni por se nuk e këshillon, duke e konsideruar më efikas diskutimin brenda sistemit.
“Për sa i përket djegies së mandatave nuk e kam dëgjuar, kam dëgjuar marrëdhënie të kushtëzuar, zëra të veçantë para këtij sesioni ka qenë djegia e mandatave. Më falni për mungesën e modestisë, falë eksperiencës i kam provuar të dyja luftën politike brenda dhe jashtë sistemit. Nuk janë djegur ndonjëherë mandatet, megjithatë ka gjithmonë një herë të parë, por nuk e këshilloj. Kushtëzimi, apo termi që djegim mandatin kanë qenë të diskutuara edhe nga opozita e dikurshme, por më rezulton se më efikas është diskutimi brenda sistemit”, deklaroi Ruçi.
