Konkretizimi në praktikë i reformën në drejtësi është një nga prioritetet e ambasadores amerikane Yuri Kim, dhe këtë ajo ka nisur ta vërë në zbatim që në ditët e para të ardhjes së saj në Tiranë me vizitat e shumta që ka zhvilluar me krerët e institucioneve të reja të krijuara nga drejtësia e re. Të premten ambasadorja Kim është takuar me anëtarët e Këshillit të Lartë Gjyqësor nga të cilët kërkoi një drejtësi të paanshme dhe përkushtimin e tyre në sundimin e ligjit.
Në njoftimin e publikuar nga Ambasada Amerikane, Yuri Kim shprehet se Shqipëria duhet të krijojë sa më shpejtë institucionet e reja të drejtësisë për të vendosur në funksion të plotë shtetin e së drejtës.
‘Ambasadorja Kim u takua sot me anëtarët e Këshillit të Lartë Gjyqësor dhe i përgëzoi ata për përpjekjet e tyre në përmirësimin e administrimit të gjyqësorit dhe gjykatave. Ajo theksoi përkushtimin e Shteteve të Bashkuara për të ngritur një sistem drejtësie të paanshëm, bazuar në sundimin e ligjit, ndërsa Shqipëria përpiqet të përmbushë potencialin e saj të plotë duke krijuar institucione të forta demokratike’ shkruhet në njoftimin e Ambasadës Amerikane.
Ditë më parë Yuri Kim është takuar edhe me kreun e KLP dhe SPAK, ku u ka kërkuar ngritjen e institucioneve sa më të shpejtë për të forcuar shtetin e së drejtës.
