Një dëshmitar okular i shndërruar në hero, ka folur për autorin e tragjedisë në Monterey Park, të Kalifornisë ditën e djeshme, ku një burrë vrau me armë zjarri 10 persona gjatë festimeve të Vitit të Ri Hënor.
“Ai po më shikonte mua dhe njerëzit përreth, duke mos fshehur se po përpiqej të bënte dëm. Sytë e tij ishin kërcënues. Ishte arma e parë e vërtetë që kishte parë në jetën reale. Zemra ime po rrihte fort, e dija se do të vdisja. Nga gjuha e trupit, shprehja e fytyrës, sytë, ai po kërkonte njerëz”, tha dëshmitari Brandon Tsay për mediat e huaja.
Tsay ishte personi që sinjalizoi autorin dhe rrezikoi jetën për t’i hequr atij armën nga dora.
“Ai moment, ishte instinktiv. Diçka ndodhi atje, por nuk e di se çfarë më ndodhi”, tha Tsay për momentin e përleshjes me autorin.
Pasi Tsay kishte në kontroll armën, ai e drejtoi atë te i dyshuari dhe i bërtiti që të largohej.
Tragjedia ndodhi ditën e djeshme, ku shumë persona ishin duke festuar Vitin e Ri Hënor, në Kaliforni. Menjëherë pas ngjarjes, autori u përpoq që të arratisej por u ndalua në kohë.
Pas ndalimit, policia e Kalifornisë deklaroi se autori u gjet i vdekur brenda një fugoni pas një përplase me oficerët, duke mos dhënë më shumë detaje.
Por, mediat e huaja kanë raportuar se i dyshuari është vetëvrarë, ndërsa nuk bëjnë të ditur më shumë detaje se si ka rrjedhur ngjarja.