Deri në këtë pikë të sezonit, Andre Silva dhe Kaliniç nuk i kanë respektuar aspak pritshmëritë. Kroati ka shënuar katër gola në 21 ndeshjet e luajtura me fanellën kuqezi mes kampionatit dhe Kupave.
I ardhur me etiketën e “njeriut skuadër”, 29- vjeçari nuk ka treguar asnjë nga cilësitë, për të cilat u afrua te kuqezinjtë.
Nëse në përvojat e tij të mëparshme vihej në dispozicion të ekipit dhe me efektin e anasjelltë gjente golat te “Djalli”, ai nuk po arrin të dalë në pah.
Marko Fasone pagoi plot 25 milionë euro për kartonin e tij si profili ideal për skemat e ishtrajnerit Vinçenco Montela, me numrin shtatë kuqezi që i ka sjellë renditjes së Milanit në Serinë A vetëm shtatë pikë.
Katër rrjetat e deritanishme (ndërkohë që 4 ia ka shënuar vetëm Interit në të kaluarën )i kanë kushtuar klubit 5.41 milionë euro secila dhe Xhenaro Gatuzo shpreson ta rikuperojë duke shtuar numrin e vertikalizimeve dhe gjithashtu atë të krosimeve në zonë.
Po katër gola CV-ja e Kaliniç i numëron edhe në përballjet ndaj Kaljarit, me Milanin që shpreson të përfitojë nga ky zakon fatsjellës i sulmuesit në sfidën e ardhshme në kampionat, pikërisht ndaj ekipit nga Sardenja.
Andre Silva – Sipas “TuttoSport” edhe statistikat e Andre Silvës nuk janë më të mira, sidomos në raportin kosto kartoni dhe sasi golash.
Portugezi nuk ka pasur shanset e Kaliniçit në Serinë A, por në Ligën e Europës ka qenë ndër të preferuarit e Montelës. Besimin e dhënë portugezi e ka shpërblyer me dhjetë gola, por asnjëri syresh nuk është realizuar në kampionat.
Edhe në rastin e tij golat kushtojnë shtrenjtë, por për fatin e keq të Milanit, jo për renditjen, por për arkat e klubit.
Për 21-vjeçarin u paguan 38 milionë euro për ta rrëmbyer nga Porto dhe çdo gol i tij me fanellën kuqezi ka kushtuar deri më tani pothuajse katër milionë euro. Bilja – Situatë analoge edhe për Lukas Biljan. Argjentinasit më shumë se golat i kërkohet gjeometria, por Milani nën regjinë e tij ka çaluar dukshëm.
Me një notë mesatare prej 5,67, mesfushori nuk po arrin të justifikojë në fushë thuajse 25 milionë eurot që Milani shpenzoi në verën e kaluar për ta blerë nga Lacio.
Nën notën mesatare, por edhe nën nivel në thuajse të gjitha ndeshjet me kuqezinjtë, 6- ta e marrë ndaj Krotones duket si thirrja e fundit për rikuperimin e tij. Së bashku me dy të sipërpërmendurit edhe ai ka një afat, të cilin duhet ta respektojë nëse dëshiron të luajë në “San Siro” edhe në sezonin tjetër
