Një sulm me thikë ka ndodhur në Holandë, duke plagosur disa persona, përfshirë një oficer policie. Të paktën një prej të plagosurve ndodhet në gjendje të rëndë. Incidenti ka ndodhur herët këtë mëngjes në Hoofddorp, një qytet në Haarlemmermeer, në Holandën veriore.
Policia raportoi se mori një njoftim për sulmin në Fanny Blankers-Koenlaan rreth orës 6 të mëngjesit. “Ka disa të plagosur, përfshirë një koleg. Ambulanca të shumta janë në vendngjarje,” thuhet në deklaratën e Policisë së Noord-Holland.Në vendngjarje ishte dërguar edhe një helikopter për trajtim traumatik dhe më shumë se gjashtë ambulanca, së bashku me dy ekipe për trajtimin e urgjencave. Pamjet nga vendngjarja treguan një kordon policie dhe ambulanca të parkuara përgjatë rrugës, ndërsa oficeri i plagosur u dërgua në spital.
Ndërkohë, policia ende po heton shkakun e sulmit, dhe nuk ka dhënë detaje mbi identitetin e viktimave ose natyrën e plagëve, përveç faktit që një person është në gjendje të rëndë. Fanny Blankers-Koenlaan është një zonë banimi për persona me aftësi të kufizuara.
