Një ngjarje tronditëse ka ndodhur pasditen e së enjtes në qytetin italian të Pratos, ku një shtetas shqiptar ka humbur jetën si pasojë e një sulmi brutal me thikë.
Sipas autoriteteve italiane, viktima u rrethua nga disa bashkatdhetarë dhe u godit me thikë në bark. Pas sulmit, ai u la i shtrirë në rrugë në gjendje të rëndë. Pavarësisht ndërhyrjes së shpejtë të ndihmës së parë dhe transportimit në spital, shqiptari nuk mundi t’u mbijetojë plagëve të marra dhe ndërroi jetë pak minuta më vonë.
Ngjarja ka ndodhur në zonën midis Chiesa Nuova dhe Galceti, pranë kopshtit të rrugës Baracca, ku tashmë janë vendosur forcat e policisë për hetime intensive. Po analizohen pamjet e kamerave të sigurisë dhe po mblidhen dëshmi nga kalimtarë dhe banorë të zonës, me qëllim identifikimin e autorëve dhe zbardhjen e plotë të motivit të krimit.
Prokuroria e Pratos, nën drejtimin e prokurorit Luca Tescaroli, ka nisur një çështje penale për vrasje të qëllimshme. Sipas burimeve zyrtare, hetimet po përqendrohen në rrethanat e konfliktit dhe në identifikimin e autorit kryesor të goditjes me thikë.
