Komiteti Ndërkombëtar i Kryqit të Kuq tha se janë sulmuar zyrat e tij në Gaza. “Predha të kalibrit të rëndë kanë rënë disa metra larg zyrave të Komitetit Ndërkombëtar të Kryqit të Kuq në pasditen e së premtes”. Si pasojë e sulmit 22 persona janë vrarë dhe 45 të tjerë janë plagosur. “Sulmi ka dëmtuar strukturën e zyrës së Kryqit të Kuq, e cila është e rrethuar me qindra civilë të pastrehë që po jetojnë në tenda, përfshirë shumë kolegë palestinezë”. Nga shtetet e fuqishme dhe organizatat ndërkombëtare është kërkuar të shmangen sulmet mbi civilë dhe organizatat humanitare.
Komiteti Ndërkombëtar të Kryqit të Kuq deklaroi se ky incident i rëndë është vetëm njëri prej disave në ditët e fundit. Një zëdhënës i ushtrisë izraelite i ka thënë transmetuesit britanik BBC se hetimet fillestare tregojnë se “nuk ka tregues” që është kryer sulm në atë zonë, por që po kryhen hetime. Ministria e Shëndetësisë në Gazë ka raportuar për shifra tjera, duke thënë se 25 njerëz janë vrarë dhe 50 janë plagosur, dhe fajtor ka bërë Izraelin.
Ushtria izraelite ka nisur fushatë ushtarake për të shkatërruar Hamasin – grupin palestinez të shpallur terrorist prej Shteteve të Bashkuara dhe Bashkimit Evropian pas sulmit të pashembullt të militantëve të grupit, në jug të Izraelit, më 7 tetor.Në atë sulm janë vrarë rreth 1.200 izraelitë dhe janë marrë peng mbi 240 të tjerë.Ministria e Shëndetësisë në Gazë deklaron se prej nisjes së luftës janë vrarë më shumë se 37.000 palestinezë, kryesisht gra dhe fëmijë.
