Të paktën 130 persona kanë humbur jetën, pasi një stuhi tropikale ka pwrfshirw pjesën jugore në Filipine, ndërsa dhjetra të tjerë rezultojnë të zhdukur. Stuhia Tembin ka sjellë përmbytje të mëdha dhe rrëshqitje dheu në disa pjesë të ishullit Mindanao.
Dy qytete janë goditur rëndë Tubod dhe Piagapo, ku një pjesë e shtëpive janë shkatërruar. Filipinet përballen shpesh me stuhi tropikale vdekjeprurëse, megjithatë Mindanao nuk është goditur shpesh. Sipas policisë, në qytetin Tubod kanë humbur jetën 19 persona.
“Lumi doli nga shtrati dhe përfshiu disa shtëpi. Në operacionin e shpëtimit kanë marrë pjesë edhe vullnetarë, të cilët janë përpjekur të nxjerrin trupat nga rrënojat” – ka bërë të ditur policia. Ndërsa 10 persona kanë humbur jetën në qytetin Piagapo, 10 km në lindje të qytetit Tubod.
“Kemi dërguar atje skuadrat e shpëtimit por pak progres është bërë për shkak të kushteve të vështira të motit”-ka njofgtuar më tej policia. Sakaq, është raportuar edhe për vdekje të tjera në qytetet Sibuco dhe Salug. Gjithashtu në vend ka pasur ndërprerje të shumta të energjisë eletrike dhe shkëputje të linjave telefonike.
