Një studim i ri në Kinë ka gjetur se koronavirusi i ri ka pësuar mutacion në të paktën 30 variacione të ndryshme.
Studimi u krye nga Profesor Li Lanjuan dhe kolegët e tij nga Universiteti Zhejiang në Hangzhou, Kinë dhe u botua në një letër të pa shqyrtuar nga kolegët, të lëshuar në faqen e internetit medRxiv.org të dielën.
Studimi tregon se ekspertët e kanë nënvlerësuar së tepërmi mundësinë e virusit për të pësuar mutacion, e ndërsa variacione të ndryshme kanë prekur vende të ndryshme të botës, duke e bërë të vështirë gjetjen e një kure gjithëpërfshirëse, raporton newsbomb.al.
11 variacione të virusit të zgjedhur në mënyrë rastësore nga qyteti Hangzhou në Kinë u analizuan dhe testuan për të parë me sa efikasitet mund të infektonin dhe vrisnin qelizat.
“Sars-CoV-2 ka pësuar mutacione të afta për të ndryshuar në mënyrë thelbësore patogjenitetin e saj,” shkroi profesori Li.
Ekipi zbuloi se disa nga mutacionet mund të çojnë në ndryshime funksionale në proteinën e koronës së virusit, njoftoi South China Morning Post. Ajo është proteina që koronavirusi përdor për t’u ngjitur me qelizat e njeriut.
Ekipi i studiuesve infektoi qelizat me llojet COVID-19 që bartin mutacione të ndryshme, nga të cilat disa lloje më agresive u zbulua se gjeneronin 270 herë më shumë ngarkesë virale sesa llojet më të dobëta. Llojet agresive të virusit i vranë qelizat njerëzore në një kohë më të shpejtë.
Rezultatet treguan “se diversiteti i vërtetë i variacioneve virale është i nënvlerësuar në masë të madhe,” shkroi Li.
