Zgjedhjet parlamentare të 30 gushtit në Malin e Zi prodhuan debat edhe në Shqipëri, pasi kryeministri Edi Rama dje shpërndau një video-mesazh në mbështetje të presidentit Gjukanoviç, ndërsa sot në një tjetër mesazh, ai u kërkoi shqiptarëve që të votojnë për listën shqiptare.
Por përse e bëri mesazhin mbështetës për Gjukanoviç? Këtë e shpjegoi vetë Rama ditën e sotme.
“Ne kemi bërë përpjekje për të bashkuar faktorët atje dhe ministri në detyrë Gent Cakaj sot ka punuar me faktorin shqiptar.
Nëse do u bëja thirrje shqiptarëve për të mos votuar për listën shqiptare mesazhin do ta bëja shqip, sikur e bëra sot.
Ai ishte mesazh i kërkuar si kontribut nga partia simotër socialdemokrate e Presidentit Gjukanoviç dhe ishte bindja ime dhe mesazhi për shqiptarët ishte i sotëm për të votuar për listën shqiptare.
Mesazhet janë komplementare sepse partneriteti i shqiptarëve me Gjukanoviç dhe lidershipi i presidentit për Malin e Zi është me rëndësi strategjike për shqiptarët dhe vetë Shqipërinë” tha ai për Tv Klan.
