Neymar ka insistuar se karriera e tij në Paris Saint-Germain veçse po fillon, përkundër spekulimeve të vazhdueshme që e lidhin me një rikthim në Spanjë te rivali i ish-klubit të tij, Real Madridi.
PSG-ja do të luajë nesër në udhëtim te Lille, tamam gjashtë muaj pas transferimit rekord të Neymarit nga Barcelona, transmeton Express.
Neymar ka thënë se nuk e ka pritur një fillim të tillë në PSG, pasi ka shënuar 26 gola në 24 ndeshje.
“Nuk e prisja këtë në fillim, këto statistika me PSG-në. Por, këtu jam për t’i ndihmuar bashkëlojtarët dhe klubin”, ka thënë Neymar për PSG TV.
Ai ka thënë se ka për të dhënë shumë për PSG, përkundër spekulimeve që e largojnë atë nga kryeqyteti francez.
“Ky është veç fillimi”, ka thënë 25-vjeçari.
“Të besh histori me klub është e rëndësishme për një lojtar. Prandaj kam ardhur këtu. Të bëj histori dhe ta ndihmoj PSG-në të përparojë”, ka shtuar ai.
