Ditën e djeshme ka ndodhur një tjetër episod dhune, përgjatë ndeshjes Përmeti-Këlcyra në Kategorinë e Dytë. Arbitri kryesor është dhunuar pas akordimit të një penalltie në favor të ekipit vendas. Lojtarët e Këlcyrës e kanë ndjekur dhe e kanë dhunuar në grup të riun e kolegjiumit të Fierit, Alvi Paco.
Kjo nuk është hera e parë që në kampionatin shqiptar të futbollit shënohen raste të dhunës ndaj arbitrave, pasi ky është një fenomen i shpeshtë sidomos në kategoritë e ulëta.
Rastet e dhunës në Kategorinë e Parë dhe Kategorinë e dytë në Shqipëri:
Mars 2009, Mentor Sopjani
Gjyqtari kryesor Sopjani dhe anësori Fatmir Limaj u dhunuan në ndeshjen Tërbuni-Kastrioti (1-1, java 19, Kategoria e Parë 01.03.2009). Ndeshja u ndërpre, Sopjani mori mjekim urgjent ne spitalin e Pukës.
Dhjetor 2009, Edvaldo Dyrmishi
Në takimin Këlcyra-Tomori 0-1 (06.12.2009, java 11 e Kategorisë së Dytë, Grupi i Jugut), anësori Edvaldo Dyrmishi u godit me gur. Gjyqtari kryesor ndërpreu ndeshjen disa herë gjatë atij takimi.
2010, Mane, Qiriazi, Maze
Lojtarët e Vlorës zunë me shkelma dhe grushte gjyqtarin nga Erseka, Mane dhe ndihmësit e tij, Qiriazi dhe Maze, të cilët i konsideruan fajtor në humbjen 1-0 me Domosdovën të zhvilluar në Përrenjas (sezoni 2009-2010).
Shkurt 2010, Denis Agaraj
Zyrtari i Gramozit, Altin Hodo, goditi me grusht anësorin Denis Agaraj gjatë takimit Gramozi-Vllaznia 1-1 (sezoni 2009-2010, java 22, 20.02.2010). Hodo u ndëshkua me përjashtim të përjetshëm nga futbolli nga Komisioni i Disiplinës.
Mars 2011, Astrit Mahmutaj
Anësori u godit me grushte nga mjeku i Leshnjes, Caka dhe sulmuesi Bubeqi, gjatë ndeshjes Lushnja-Pogradeci 1-2 (java 20 Kategorisë së Parë, sezoni 2010-2011, 01.03.2011).
Dhjetor 2011, Lorenc Jemini
Gjyqtari u godit në ndeshjen Laçi-Kastrioti (sezoni 2011-2012, java 11, 04.12.2011). Jemini u rrah nga presidenti i Laçit, Pashk Laskaj dhe disa drejtues të tjerë të klubit laçjan. Laskaj u ndëshkua me dy vjet për të mos ndjekur ndeshjet ekipit të tij, ndërkohë që Laçit iu zbritën 6 pikë në renditje dhe ndeshjet si organizator do t’i zhvillojë jashtë shtëpisë.
Dhjetor 2011, Enea Jorgji
Gjyqtari u godit në ndeshjen Pogradeci-Teuta (sezoni 2011-2012, java 12, 17.12.2011). Pogradecit iu hoqën tri pikë nga renditja.
Prill 2017, Ardit Merdanaj
Ndeshja e Kategorisë së Dytë të grupi B, Tepelena-Domosdova u ndërpre për shkak të goditjes me grushta ndaj gjyqtarit të takimit, Ardit Merdanaj.
Arbitri i ndeshjes u godit me grushta nga ana e lojtarëve të ekipit të Domosdovës, duke e detyruar atë të ndërpresë sfidën në minutën e 65-të.
Shkak i sherrit ka qenë një penallti që gjyqtari i ndeshjes ka akorduar për skuadrën e Tepelenës.
Tetor 2017, Xhulio Mani
Gjatë ndeshjes, Skrapari-Elbasani, kur rezultati ishte 1-0 për miqtë, në minutën e 68-të, vendësit shënojnë gol, por e anulon anësori Xhulio Mani.
Në këtë moment, lojtarët e Skraparit vrapojnë drejt anësorit dhe e godasin. Arbitri anësor ka akuzuar se është goditur nga lojtari Gogo i Skraparit.
Përgatiti: AlpeNews.al
