Spanja duket se po shërohet nga koronavirusi. Autoritetet shëndetësore në Spanjë kanë raportuar për të dytën ditë radhazi vetëm një të vdekur nga COVID-19. Deri tani numri i të vdekurve në Spanjë nga koronavirusi ka shkuar në 27,119.
Po ashtu edhe numri i rasteve të reja është ulur. Në 24 orët e fundit janë regjistruar 182 persona të infektuar me koronavirus, 49 më pak se një ditë më parë, duke e çuar në 237,906 numrin total.
Spanja kërkoi nga partnerët e Bashkimit Evropian që të vendosin rregulla të përbashkëta për rihapjen e kufijve dhe për rikthimin e lëvizjes së lirë në zonën e ashtuquajtur Schengen.
Vendet e BE-së, por edhe të tjerat, i kanë mbyllur kufijtë që prej mesit të muajit mars, për të frenuar përhapjen e koronavirusit. Me rënien e numrit të rasteve të reja, vendet veç e veç kanë nisur lehtësimin e masave kufizuese, përshirë edhe rihapjen e kufijve.
“Ne duhet të punojmë me partnerët tanë evropianë për të përcaktuar rregullat e përbashkëta që do të na lejojnë rikthimin e lëvizjes së lirë në territorin evropian”, tha ministrja e Jashtme e Spanjës, Arancha Gonzalez pak ditë më parë.
Edhe pse vendet e BE-së kanë caktuar data të ndryshme për rihapjen e kufijve, duhet të ketë parime dhe rregulla të përbashkëta në të gjithë zonën Schengen, shtoi ajo.
