Revolta e Spaçit e 21 majit 1973 hyri në historinë e Shqipërisë si një nga ngjarjet më dramatike që tronditi regjimin komunist. Për tri ditë me radhë, të burgosurit politikë të këtij kampi, pas thuajse tridhjetë vitesh shtypje, ngritën midis maleve të Mirditës flamurin kombëtar kuqezi pa yllin e kuq, simbolin e diktaturës. Sot, kjo revoltë sillet në vëmendje përmes një dokumentari që erdhi premierë në kinema “Millenium”.
Filmi është një homazh për të gjithë pjesëmarrësit e atij akti trimërie, veçanërisht për të pushkatuarit: Pal Zefi, Dervish Bejko, Hajri Pashaj dhe Skënder Daja. Ata, si dhe 6000 të tjerë të pushkatuar politikë të regjimit, mbetën të zhdukur, me eshtrat ende të pagjetura.
“Spaçi është plagë e pambyllur. Ky kamp famëkeq mes maleve të Mirditës, një skenë e fshehur në komunizëm, një vend torturash, vuajtjesh, vend që zhbënte njeriun. Por edhe një vend historik, ku shqiponjat që kishim me hekura në duar guxuan, u ngritën dhe ngjyrosën me gjakun e tyre flamurin kombëtar pa yllin e bolshevizmit enverist, por siç ishte në kohën e Skënderbeut, ashtu siç është tani.”, – tha autori i dokumentarit, Besim Ndregjoni.
