Southampton ka thyer rekordin e transferimeve në merkato, duke realizuar blerjen më të shtrenjtë në historinë e klubit pasi pagoi 25 milionë euro për blerjen e Guido Carrillo nga Monaco.
Carrillo, që do të mbajë fanellën me numrin 9 në “St.Mary”, pasi firmosi për tre vite e gjysmë, do të bashkohet sërish me trajnerin Mauricio Pellegrino, me të cilin ka punuar te Estudiantes. Por sipas shtypit anglez ky rekord nuk do të zgjasë shumë sepse në ditët e fundit të kësaj merkatoje, Southampton do të paguajë 35 milionë euro te Spartak Moskë për të marrë Quincy Promes.
Blerja e argjentinasi Carrillo ka thyer rekordin e mëparshëm të “shenjtorëve” që mbahej nga Mario Lemina, i cili kaloi nga Juventus te Southampton për 22 milionë euro gjatë merkatos së verës.
Ai do të debutojë të shtunën në ndeshjen e Kupës së Anglisë kundër Watford. Carrillo ka shënuar pesë gola në 23 ndeshje për Monaco gjatë këtij sezoni, por rrallë herë ka qenë titullar. Me Monaco, në dy vjet e gjysmë, ai ka shënuar 15 gola në 65 ndeshje, 43 prej të cilave i nisur si zëvendësues.
