Drejtoria e Përgjithshme e Tatimeve, rikujton të gjithë tatimpaguesit e biznesit të vogël, se sot është afati i fundit për deklarimin dhe pagesën e TVSH-së, për periudhat tatimore prill-maj-qershor 2018.
Tatimpaguesit, të cilët nuk do të përmbushin afatet e plotësimit dhe dorëzimit të deklaratës së thjeshtuar, do të përfshihen automatikisht në përgjegjësinë tatimore të TVSH-së.
DPT dëshiron të qartësojë gjithashtu se, mosdorëzimi i deklaratës brenda afatit shoqërohet me një penalitet prej 5 mijë lekësh.
Ndërsa, nuk do të ketë asnjë penalizim nga ana e administratës tatimore në rast se konstatohet se deklarata e thjeshtuar e TVSH-së është plotësuar me gabime.
Për të shmangur çdo gabim të mundshëm Drejtoria e Përgjithshme e Tatimeve fton biznesin e vogël të shfrytëzojë të gjithë infrastrukturën e nevojshme që administrata tatimore ka vënë në dispozicion për mbarëvajtjen e këtij procesi.
Tatimpaguesit të cilët gjatë vitit 2017, kanë realizuar një qarkullim prej 2.000.000 – 5.000.000 lek janë regjistruar automatikisht nga Administrata Tatimore me përgjegjësinë tatimore të Tatimit mbi Vlerën e Shtuar.
Në të gjithë vendin janë 11 mijë e 700 biznese që hyjnë për herë të parë në skemën e TVSH-së.
