Një sondazh i kryer nga PNUD tregon se shqiptarët sa më shumë kontakte kanë me gjyqësorin, aq më pak besim kanë te drejtësia.
Sondazhi i kryer mbi një kampion prej rreth 1.800 personash sjell në vëmendje se 78% e banorëve të kryeqytetit nuk kanë besim te gjykatat.
“I pyetem njerëzit nëse kanë besim te sistemi i drejtësisë dhe shifrat janë shumë të mëdha. rreth 70% e të anketuarve thanë se nuk e kanë besim te sistemi.
Rreth 78% e të anketuarve në Tiranë u përgjigjën se nuk kanë besim te sistemi i drejtësisë. Të njëjtën përgjigje kanë dhënë edhe rreth 74% e të anketuarve në zonat jashtë Tiranës. Dhe të shohim një prej rezultateve më interesantë dhe të çuditshëm të sondazhit.
Mendohet gjerësisht se njerëzit nuk i besojnë sistemit pasi nuk e njohin, por e vërtetë është e kundërta. Sa më shumë e njohin sistemin, aq më shumë qytetarët nuk i besojnë atij.
81% e personave që kanë pasur përvojë të drejtpërdrejtë me sistemin e drejtësisë, nuk kanë besim te ai. Ndërkohë që shifra e atyre që nuk kanë pasur përvojë të drejtpërdrejtë por shprehen mosbesues ndaj tij është 66%,” tha Sinisha Miatoviç, përfaqësues i PNUD
Sondazhi i PNUD ka qëllim të masë aksesin e shqiptarëve në sistemin e drejtësisë, veçanërisht atë të shtresave në nevojë.
Gjetjen e tij do të merren parasysh në projektligjin për ndihmën juridike, i cili do të kalojë se shpejti në Kuvend.
