Socialistët duket se kanë nisur punën për të mbledhur Asamblenë Kombëtare, për të vijuar procesin e ristrukturimit dhe zgjedhjet e brendshme në Parti.
Sekretari Organizativ i PS Arben Pëllumbi, ka thënë në një intervistë për Ora Neës se anëtarët e Asamblesë mund të mblidhen në muajin korrik, ndërsa për ambientin mund të gjendet një sallë e madhe ku të respektohet distancimi fizik ose të zhvillohet online.
“Ne në datën 29 shkurt kemi pasur ditën më të rëndësishme të Kongresit. Më 9 mars ne u futëm në situatën e pandemisë dhe nuk patëm mundësinë për tu futur në procesin e ristrukturimit dhe zgjedhjeve të brendshme në parti. Ne do të mbledhim asamblenë e përgjithshme për të cilën jemi duke u përgatitur qoftë në variantin online ose do të shkojmë në një sallë të madhe dhe të respektojnë distancën sociale. Duhet të vazhdojmë të jemi shumë të kujdesshëm mbi këto protokolle sigurie anticovid. Ne si forcë politike po shohim për të mbledhur Asamblenë tonë Kombëtare që besoj se do ta kryejmë në fillim të korrikut për të vazhduar në dy struktura shumë të rëndësishme. Kryesia e PS dhe Sekretariati i saj”, u shpreh Arben Pëllumbi, Sekretar Organizativ i PS.
