Një shtetas izraelit i akuzuar për përfshirje në skandalin e trafikimit të organeve njerëzore në Kosovë një dekadë më parë është arrestuar në Qipro dhe autoritetet në Prishtinë kanë kërkuar ekstradimin e tij për t’u përballur me akuzat në gjykatën e Prishtinës, shkruan “Reuters”.
Policia akuzon izraelitin Moshe Harel se ka kërkuar njerëz që kishin nevojë për transplant veshkash dhe sillte në Kosovë dhurues organesh nga Turqia dhe ish-Bashkimi Sovjetik duke ju premtuar pagesë deri në 12 mijë euro. Ndërsa personat që merrnin organet, kryesisht izraelitë, paguanin nga 80 mijë deri në 100 mijë euro për organet. Disa dhurues thonë se nuk kanë marrë asnjë pagesë.
“Në bazë të një urdhër arresti ndërkombëtar i dyshuari Moshe Harel u arrestua para dsa ditësh në Qipro. Ai ka qenë person në kërkim që në vitin 2010” tha për Reuters zëdhënësi i policisë Baki Kelani. Moshe Harel u arrestua në 2012 në Izrael në lidhje më një hetim paralel por nuk u ekstradua në Kosovë pasi vendi nuk kishte marrëdhënie diplomatike me Izraelin. Skandali i organeve u zbulua në 2008 kur një shtetas turk u ndalua në aeroportin e Prishtinës me dhimbje të forta pasi i kishin hequr veshkën.
Rrjeti i trafikimit të organeve vepronte në një klinikë në periferi të Prishtinës. Drejtori i klinikës Lutfi Dervishi u dënua me 8 vite burgim për krim të organizuar dhe trafik njerëzish ndërsa djali i tij Arbani u dënua me 7 vite burgim në 2013, megjithëse asnjeri prej tyre nuk e ka kryer dënim pasi u arratisën në atë kohë. Në 2016 një gjykatë e Kosovës urdhëroi një gjyq të ri për doktorët dhe zyrtarët e përfshirë në këtë çëshje dhe gjyqi akoma vazhdon. Sipas policisë, Lutfi Dervishi u kap vitin e kaluar dhe është një prej të akuzuarve në gjyqin e ri. Rusia gjithashtu ka lëshuar një urdhër arresti ndërkombëtar për izraelitin Moshe Harel.
