12 të arrestuarit e dosjes “Rana e Hedhun”, të hetuar për falsifikim dokumentesh dhe tjetërsim pronash, ku mes tyre dhe kreu i bashkisë Lezhë, Fran Frrokaj, do të dalin këtë të hënë para Gjykatës së Lezhës.
Administrata e Gjykatës sqaroi një ditë më parë për Report Tv se verifikimi i masave të dhëna në mungesë ndaj të arrestuarve, ku pjesa më e madhe janë zyrtarë të bashkisë dhe hipotekave, do të bëhet prej orës 09.00 të datës 19 Mars.
Zyrtarët lokal të hetuar nga Prokuroria akuzohen se në bashkëpunim me njëri-tjetrin kanë tjetërsuar afro 260 mijë m2 në zonën e plazhit, duke e kthyer në pronë private e më pas duke e shitur kundrejt vlerave të konsiderueshme monetare.
Arrestimi i kryebashkiakut Frrokaj është pritur me protesta nga mbështetësit e tij, të cilët kanë kërcënuar me përshkallëzim të protestave, nëse ai lihet në burg. Mbështetësit e tij pretendojnë se Frrokaj nuk ka lidhje me abuzimin e pronave bregdetare dhe arrestimi i tij është politik.
Protestuesit kanë qëndruar para Komisariatit të Lezhës, që nga momenti i arrestimit të Frrokajt, duke kërkuar lirimin e tij. Ndërkohë, mbrëmjen e kaluar policia ka shoqëruar disa prej simpatizantëve, duke e cilësuar protestën e tyre të paligjshme dhe duke i paralajamëruar ata me ndjekje penale, nëse vijojnë tubimin.
