Ka marë një rrjedhë krejt të papritur hetimi i brendshëm që po zhvillohet në lidhje me skandalin e zhdukjes nga dosja e Dritan Ginës ish Kryeprokurorit të qarkut të Elbasanit, të një shume prej 35 mijë eurosh të deklaruara sipas tij si “dhuratë”.
Skandali është bërë publik nga mediat orët e fundit dhe ka vënë në lëvizje Komisionin e Pavarur të Kualifikimit (KPK) shkalla e parë e vettingut për gjyqtarët dhe prokurorët e sistemit të drejtësisë shqiptare.
Dritan Gina është bashkëshorti i Rovena Gashit, njeriut më të afërt të ish Prokurorit të Përgjithshëm të Shqipërisë Adriatik Llalla, pasi ai sapo mori detyrën e emëroi atë Drejtoreshë të Drejtorisë së Marrëdhënieve Juridiksionale me Jashtë dhe të sektorit të Dekriminalizimit.
Në deklaratën e pasurisë së vitit 2011, Gina shkruan në njërën nga faqet e para të formularit (bashkëshortja e tij nga ana tjetër, ka shkruar se ka marë dhuratë një shtëpi në Tiranë?!) se ka marë si dhuratë 35 mijë euro dhe se detajet rreth saj i kishte përshkruar në faqen 6 të saj.
Por ajo faqe është zhdukur nga dosja e z. Gina çka besohet deri tani se është bërë prej tij për të zhdukur gjurmët e një shumë marramendase e cila nuk mund të justifikohet edhe aq thjeshtë në këtë mënyrë.
Ajo që i ka shqetësuar më shumë ata që po e verifikojnë këtë skandal të ri të z. Gina është fakti se kjo shkresë mund të jetë zhdukur shumë herët. Që në kohën kur është bërë deklarata.
E ajo periudhë përkon me kohën kur në krye të Inspektoriatit të Lartë të Deklarimit dhe Kontrollit të Pasurive (tetor 2008 – dhjetor 2012) ka qenë Adriatik Llalla i cili më pas u bë Prokuror i Përgjithshëm dhe bashkëshorten e Dritan Ginës e kishte bashkëpunëtoren më të afërt e besnike.
A thua që ky të ketë qenë borxhi dhe sekreti i madh i errët që nisi të bëjë një e të pandarë më pas Adriatik Llallën dhe Rovena Gashin?!
Telenovela vazhdon…
Përgatit: Alpenews.al
