Numri i njerëzve të infektuar me Covid-19 në mbarë botën që nga fillimi i pandemisë i ka kaluar 40 milionë, njoftoi këtë të hënë Universiteti Johns Hopkins, i cili mbledh raportime nga e gjithë bota. Sipas ekspertëve shifra e vërtetë mund të shkojë deri në 780 milion, kjo pasi shumë njerëz nuk kanë pasur simptoma, ndërsa disa qeveri kanë fshehur numrin e vërtetë të rasteve.
Më shumë se 1.1 milion njerëz kanë humbur jetën nga virusi, edhe pse ekspertët besojnë se edhe kjo shifër është më e ulët nga sa mund të jetë në të vërtetë.
SHBA ka numrin më të lartë të rasteve të raportuara me 8,154,594 raste. Më pas vjen India me 7,550,273 raste.
Ndërsa Europa sipas OBSH, ka arritur një rekord të lartë javor prej gati 700,000 rastesh. OBSH tha se rajoni është përgjegjës për rreth një të tretën e rasteve në të gjithë botën. Britania, Franca, Rusia dhe Spanja përbëjnë rreth gjysmën e të gjitha rasteve të reja në rajon. Aktualisht në të gjithë Evropën, qeveritë po ndërmarrin kufizime të reja për të luftuar një valë të dytë të infeksioneve.
