Situata e kohëve të fundit është bërë vërtetë shqetësuese. Kjo për faktin e numrit të madh të vatrave të zjarrit që po ndodhin nëpër qytete të ndryshme në vend, e që po rriten dita ditës. Plot 91 të tillë ndodhën në vetëm 17 ditë.
Tek qytetet më problematike kanë qenë Kavaja e Fieri, pa lënë pas dhe Lezhën. Ajo çfarë nuk është normale, është fakti se një valë e tillë zjarresht nuk ka ndodhur në ditët e nxehta të verës, e po ndodh ditët e para të vjeshtës.
Rreth kësaj situate shqetësuese reagoi edhe Ministrja e Mbrojtjes, Olta Xhaçka, e cila tha se këto vatra janë shkaktuar qëllimisht nga njerëzit. Po ashtu disa prej autorëve janë kapur.
Por çështja vijon dhe më tej. Mesa duket kjo valë e cila po vijon dita ditës, ka bërë që edhe studentët e Akademisë së Sigurisë në kryeqytet “të parapërgatien” me situata të tilla.
Pikërisht kjo Akademi ka hapur një tender për kryerjen e mbushjeve të 56 fikëseve të zjarrit. Kjo për shkak të nevojës që ka, sipas dokumentit të dorëzuar.
Por ajo çka bie në sy, është fakti se nëse në të dhënat kryesore të dosjes së tënderit, thuhet data e ora e fillimit dhe mbarimit të këtij procesi, brenda në dokumenta kjo gjë mungon. Ndoshta nga nevoja “urgjente” e mbushjes së këtyre fikëseve të zjarrit, ky është thjesht një “gabim shpejtësie”.
Ose ndoshta “nuk ka rëndësi” fillimi apo mbarimi i tenderit, por mbushja sa më shpejt e materialeve të kërkuara.
Dokumenti i plotë:
/AlpeNews.al