Prej ditësh në vendin tonë situata epidemiologjika ka pasur një përmirësim dhe numri i rasteve ka rënë ndjeshëm. Prej gati dy ditësh në vendin tonë nuk ka pasur asnjë emergjencë she shtrim në spitalet COVID-19. Kjo ndodh për herë të parë që prej rastit të parë të raportuar vjet në spitalin “Infektiv”.
Një faktor pozitiv i rëndësishëm që ka ndikuar në uljen e rasteve është edhe vaksinimi ku deri më tani janë vaksinuar 612,959 persona. Pjesa më e madhe e të vaksinuarve janë persona mbi 60 vjeç, te të cilët është aplikuar vaksina kineze.
Me përmirësimin e situatës epidemiologjike ndryshe nga viti i kaluar këtë vit pritet të kemi dhe një turizëm “të pasur” dhe lehtësim të masave anti-covid.
Lajmin e mirë për lehtësimin e masave anti-COVID e dha doktori Skënder Brataj se situata e pandemisë në vendin tonë është e mirë aktualisht dhe si rrjedhojë, së shpejti do të kemi lirim të masave.
“Pandemia është e lidhur me të gjithë botën. Ne kemi bërë 600 000 vaksina, por variantet e reja që lindin nuk ka kufi që t’i mbajë. Unë mendoj që jemi në një fazë kur vera nuk është më shqetësuese.Ne, duke zgjedhur një formë konstante të masave, të lehta deri në të mesme, së shpejti do të kemi lirim të masave. Monitorimi bëhet çdo ditë dhe çdo javë”, deklaroi Brataj.
Me përmirësimin e situatës së COVID-19 Komiteti Teknik i Ekspertëve vendosi që auditoret për studentët të hapen gjatë sezonit të provimeve si dhe u hoq karantina për emigrantët nga Maqedonia dhe Greqia.
Situata aktuale e COVID-19
Aktualisht në spitalet COVID po trajtohen 99 pacientë, 6 në terapi intensive, nga të cilët 4 pacientë janë të intubuar. Ndjeshëm janë ulur edhe fatalitetet si pasojë e koronavirusit.
Shpërndarja gjeografike e rasteve aktive sipas qarqeve:
Tiranë 9407, Shkodër 327, Fier 263, Korçë 230, Gjirokastër 238, Durrës 183, Vlorë 182, Elbasan 133, Lezhë 100.
Vaksinimi
Vaksinimi masiv në vendin tonë vijon me rimte të shpejta aq sa qeveria ka shpallur objektivin për të vaksinuar 1 milionë qytetarë brenda muajit qershor. Një lajm tjetër i mirë është se prej shumë ditësh ka rënë numri i të moshuarve të shtruar nga covid-19 dhe për këtë ka ndikuar vaksinimi. Deri më tani janë vaksinuar të moshuarit deri mbi 60-vjeç dhe numri ka shkuar mbi 300mijë. Ka nisur dhe marrja e dozave të dyta të vaksinës Sinovac, qytetarët shprehen se nuk kanë pasur shenja anësore nga injektimi.
Alpenews.al