Debati i ditëve të fundit, ku thuhet se 600 mijë sirianë do të streohen në Shqipëri ka prekur të madh e të vogël, politikan e analistë. Mirëpo, pasi kryeministri e qartësoi se kjo gjë nuk kishte shans të ndodhte duket se i ka qetësuar pak “ujërat”.
E megjithatë, interesi për ardhjen e tyre vijon të mbetet i madh. Ndryshe nga ata që mund të vijnë ose jo, AlpeNews.al ka qënë pranë një familje siriane që jeton në Tiranë. Ata nuk kanë ardhur dje apo para 1 viti, por para plot 17 viteve, Shqipëria i ka hapur dyert e i ka mirëpritur pa më të voglin problem.
Kjo është historia e Nagla Darvishit, mamasë së katër fëmijëve që prej 7 vitesh ka hapur një biznes në Tiranë. Ajo që bie në sy, është se emri i butikut të saj ështe “Sirian Style”.
“Unë dhe familja ime kemi 17 vite në Tiranë. Kemi ardhur në një periudhë ku trazirat e luftërat në Siri nuk kishin filluar ende.
Nga atëherë e deri më sot, Shqipëria është një vend më i mirë. Gjërat për mua dhe familjen time janë rregulluar këtu dhe nuk kemi ndërmend të kthehemi.
Vetëm lindjen e fëmijëve e kam bërë në Siri, pasi dua që ata ta kenë atë shtetësi e më pas ata kanë vijuar jëtën e tyre këtu.
Në fillim kisha shumë vështirësi me gjuhën por kur shoh sa mirë e kanë mësuar fëmijët e mi ndihem shkëlqyeshëm.
Pasi unë dhe bashkëshorti im që ka një biznes më të madh se i imi, u rregulluam këtu, unë mora dhe prindërit e mi në Shqipëri dhe ndihem shumë e lumtur që e kam bërë.
Vetëm dy vëllezër i kam në Siri, fatmirësisht ata janë në pjesën e qytetit ku nuk ka problem por unë kam shumë mall për ta, u bëra vite pa i takuar.”
E kështu e mbylli rrëfimin Nagla, sirianja e paqtë dhe e qeshur që kur filloj të fliste për vendlindjen ashtu e përlotur u shpreh: Më ka marr malli shumë!
Përgatiti: AlpeNews.al
