Lëvizja Socialiste për Integrim, është një forcë politike e cila u krijua në vitin 2004, pas një përplasje të Ilir Metës, me ish-kryeministrin e atëhershëm Fatos Nano.
Socialistët e quajtën në atë kohë, lëvizje e skraparllinjve të inatosur. Në vitin 2005, Ilir Meta përdori kandidatët e pavarur dhe çoi Partinë Socialiste në opozitë.
Në vitin 2009, me katër mandate deputetësh u bashkua me Berishën në qeveri, deri në vitin 2013.
Më pas, me 1 prill të vitit 2013 kaloi me Edi Ramën dhe solli “Rilindjen” në pushtet, e cila sot e ka zgjedhur president.
Me zgjedhjen e Ilir Metës president, LSI-në për një muaj e drejtoi Petrit Vasili, të cilin nuk e la më Mona ta vazhdonte detyrën, duke marrë komandën e partisë.
Sot pas dy vitesh, LSI duket më e ndrydhur dhe më e dobët se kurrë.
Të gjithë njerëzit e Ilir Metës po e braktisin Monikën dhe LSI-në.
I pari ishte deputeti Robert Bitri në parlament, dhe i dyti ishte Lefter Koka, i cili doli kundër vendimit të Monika Kryemadhit për të djegur mandatet e deputetëve.
Ndërkohë, që 17 deputetë të tjerë dogjën mandatet, të tjerë kandidatë në listat pasuese po rrëmbejnë mandatet me shpejtësi.
Mesa duket “ushtria” e Monikës është e shpartalluar dhe askush nuk e respekton vendimin e saj.
Fakti që shumica e kandidatëve në listat pritëse po rrëmbejnë mandatin, tregon se veprimi i Monikës ka qënë i nxituar, i pakonsultuar dhe i pamenduar, duke treguar se LSI-ja, jo vetëm po shkërmoqet, por se është një forcë politike që ka lindur për interesa klienteliste.
Megjithëse me pak vende në parlament, me 19 vende, LSI duket se do t’i plotësojë 100% të përfaqësuesve të saj në Kuvend.
Me shpejtësi skëterrë, asnjë nga kandidatët e listave pasuese nuk ka refuzuar të marrë mandatin.
Janë të rrallë personat që nuk kanë pranuar mandatin e deputetit.
Dje personi i radhës që mori mandatin është një nga bashkëpunëtorët e ngushtë të Ilir Metës, Ralf Gjoni, por dhe shumë personazhe të tjerë të rëndësishëm të kësaj force politike.
Pritet që pas rreth dy javësh, LSI të ketë grupin e plotë parlamentar.
